ორი წლის ფრანგი ბიჭუნას გარდაცვალების საქმეზე, ბავშვის ბებია და ბაბუა დააკავეს - რა დეტალები ხდება ცნობილი გახმაურებულ ამბავზე
2 წლის ფრანგი ბიჭუნას, ემილ სოლეილის გარდაცვალების ამბავმა მსოფლიო შეძრა. 2023 წელს ის საფრანგეთის ალპებში დაიკარგა, ბიჭუნას ცხედარი დაკარგვიდან ერთი წლის შემდეგ იპოვეს.
ბავშვის გარდაცვალების საქმეზე საფრანგეთის პოლიციამ ახლახან ოთხი ადამიანი დააკავა. მათ შორის არიან ემილის ბებია და ბაბუა ფილიპ და ენ ვედოვინები. დანარჩენი ორიც ბიჭუნას ახლო ნათესავები - მისი დეიდა და ბიძა არიან. ბავშვი სწორედ ბებია-ბაბუის სახლიდან გაუჩინარდა. დაკარგვის მომენტში სახლში არ იმყოფებოდნენ ბავშვის მშობლები, მაგრამ იქ იყო ცხრა ადამიანი - ემილის ბებია, ბაბუა, დეიდები და ბიძები.
-
ემილი ბოლოს 2023 წლის 8 ივლისს ნახეს - ის ორმა მეზობელმა, სოფლის ერთ-ერთ ქუჩაზე შენიშნა. მათი თქმით, ბავშვი მარტო დადიოდა.
პოლიციას ბავშვის დაკარგვის შესახებ ბებიამ შეატყობინა. მეორე დღეს, საძიებო სამუშაოებში სამართალდამცველებს 700-ზე მეტი ადამიანი შეუერთდა, თუმცა ვერავინ ვერაფერს მიაკვლია.
2024 წლის 30 მარტს ერთ-ერთმა მოლაშქრემ, ბავშვის ბებია-ბაბუის სახლთან ახლოს ცხედრის ნაწილები იპოვა. ექსპერტიზამ კი დაადგინა, რომ ნეშტი 2 წლის ემილის იყო. მაშინ პროკურორებმა განაცხადეს, რომ ნაპოვნ ნაწილებს ემილის სიკვდილის მიზეზის გასარკვევად მათთვის დამატებითი ინფორმაცია არ მიუცია და დაამატეს, რომ ბავშვი შესაძლოა გარდაცვლილიყო "დაცემის, მკვლელობის, ან განზრახ მკვლელობის შედეგად".
- პროკურორმა, ჟან-ლუკ ბლაშონმა განაცხადა, რომ ბავშვის ბებია-ბაბუის დაკავება ბოლო თვეების გამოძიების შედეგია და პოლიცია "რეგიონში რამდენიმე ადგილს" იკვლევს.
ფრანგული მედიის ცნობით, პროვანსის რეგიონში პოლიცია ემილის ბებიისა და ბაბუის სახლში შევიდა და მათ ერთ-ერთი სატრანსპორტო საშუალება ჩამოართვა.
ცნობისთვის, საფრანგეთში ადამიანები შეიძლება გამოსაკითხად დააკავონ, სანამ პოლიცია ბოლომდე გამოიძიებს, იყვნენ თუ არა ისინი ჩართული დანაშაულში.
